Vigdís vígir Ljóðasetrið á Siglufirði á föstudaginn


Ljóðasetur Íslands á Siglufirði verður formlega tekið í notkun föstudaginn 8. júlí næstkomandi við hátíðlega athöfn sem hefst kl. 15.00. Vigdís Finnbogadóttir fyrrverandi forseti Íslands vígir setrið, en hún er þekkt fyrir áhuga sinn á ljóðum. Þórarinn Eldjárn og fleiri ljóðskáld munu lesa upp úr verkum sínum og flutt verður áður óbirt ljóð eftir Matthías Johannessen, sem hann hefur afhent setrinu. Þá munu kvæðamenn kveða.

Á Ljóðasetri Íslands eru hátt á annað þúsund íslenskar ljóðabækur, gamlar og nýjar. Flestar hafa þær verið gefnar og verður getið um gefendur við vígsluna, meðal annars eina stórgjöf. Gestir setursins geta fengið að lesa bækurnar í hlýlegu umhverfi og fengið sér kaffi eða te í leiðinni. Á veggspjöldum er rakin þróun íslenskrar ljóðlistar og sýndir eru gripir sem tengjast sögunni. Á hverjum degi verður boðið upp á ýmsa viðburði svo sem ljóðalestur, fyrirlestra og flutning á tónlist sem tengist ljóðum.

Ljóðasetrið á Siglufirði er að Túngötu 5. Það verður opið alla daga í sumar frá kl. 14.00 til kl. 18.00. Þar er hægt að fá keyptar ljóðabækur og eru sumar þeirra fágætar. Forstöðumaður safnsins er Þórarinn Hannesson.

Ljóðasetrið bætist í hóp margra merkra safna sem fyrir eru á Siglufirði og hafa vakið athygli ferðamanna.

Mynd og texti: Aðsent frá Ljóðasetri Íslands, 3. júlí 2011. Nánari upplýsingar veita Þórarinn Hannesson í síma 865 6543 og Guðmundur Skarphéðinsson í síma 892 1846.


SIGLFIRÐINGUR.IS | Sími: 899 0278 | Netfang: sae@sae.is