Vetrargestirnir streyma að


Nú eru sumarfuglarnir okkar flestir komnir til vetrarstöðva sinna í hlýrri löndum, en þeirra í stað gestir farnir að sjást hér og þar. Mest er um þá fyrir austan og sunnan, en eitthvað ber alltaf fyrir augu fyrir vestan og norðan, mismikið þó eftir árum.

Í fyrradag var sá fyrsti mættur í tré á Hvanneyrarhólnum á Siglufirði. Þar var á ferðinni hettusöngvari, kvenfugl. Sjá mynd fyrir ofan.

Í gær bættust tveir svartþrestir við og eflaust er fleiri að vænta á næstu dögum. Með þeim er fjöldi skógarþrasta. Erfitt er um að segja hvort þeir hyggi á langferð á næstunni eða ákveði að þreyja kuldann og myrkrið í firðinum á næstu vikum og mánuðum.

Eru bæjarbúar hvattir til að setja nú epli eða perur út í tré sín, eða á einhverja aðra festu hátt uppi, svo að snjór leggist nú ekki yfir, þegar þar að kemur, eða fleygja út einhverju öðru góðgæti – matarafgöngum, brauði, korni – og þá er nokkuð víst að í þetta verði sótt, heimilisfólki til yndisauka í skammdeginu.

Ekki væri verra að fá svo af því fregnir þegar torkennilegir smáfuglarnir taka að birtast.

Víðar hér nyrðra sjást vetrargestirnir. Þorlákur Sigurbjörnsson náði þessum hauksöngvara í mistnet í garði sínum í Langhúsum í Fljótum 20. október, merkti hann og sleppti.

Forsíðumynd og texti: Sigurður Ægisson | sae@sae.is.
Mynd af hauksöngvara: Þorlákur Sigurbjörnsson.


SIGLFIRÐINGUR.IS | Sími: 899 0278 | Netfang: sae@sae.is