Úrgangur nýttur í neyðarpakka


[Dv.is, 22. september 2010]

Félagarnir Hermann Einarsson, Baldvin Ingimarsson og Steinar Svavarsson hafa fullþróað neyðarmatarpakka fyrir þurfandi á hamfarasvæðum. Pakkinn er unninn úr fiskislógi og er þannig úr garði gerður að hann hentar best þeim sem ekki hafa borðað neitt í langan tíma. Kveikjan að verkefninu var doktorsritgerð Jóns Óttars Ragnarssonar, stofnanda Stöðvar 2.

?Okkur fannst bara djöfullegt að horfa á eftir öllum þessum verðmætum í sjóinn. Þar að auki er þörfin mikil fyrir svona hjálpargögn og með þessu getum við bæði hjálpað öðrum og um leið skapað atvinnu í bænum,? segir Baldvin Ingimarsson, forstjóri SiglÓl á Siglufirði.

Í samstarfi við félaga sína, þá Hermann Einarsson og Steinar Svavarsson, stofnaði Baldvin sprotafyrirtækið síðla síðasta árs. Áður höfðu þremenningarnir verið með í þróun neyðarmatarpakka fyrir þurfandi þjóðir í um tveggja ára skeið og standa nú uppi með fullþróaða vöru. Neyðarpakkarnir eru búnir til úr fiskislógi, úrgangi sem fram til þessa hefur verið hent, og eru hannaðir fyrir nauðstadda á hamfarasvæðum sem ekki hafa fengið neitt að borða í langan tíma.

Hinn siglfirski neyðarpakki hentar vel að því leyti að hann er auðmeltanlegur og þurfandi geta því borðað hann strax eftir að hafa jafnvel verið matarlaust í marga daga. Aðspurður segir Baldvin pakkann vera tilbúinn og nú hefjist söluferlið í gegnum Matvælastofnun Sameinuðu þjóðanna. ?Við erum búnir að vera með þetta í þróun, pakkinn er tilbúinn og allt í góðu með hann, en við erum núna að vinna í söluferlinu. Fyrstu skrefin er að njóta aðstoðar utanríkisráðuneytisins og þaðan yfir til Matvælastofnun Sameinuðu þjóðanna,? segir Baldvin.

?Þessi pakki á að fullnægja dagsskammti próteins fyrir einstakling. Í honum verður massi sem verður fyrir komið í mjög geymsluþolið form og pakkað í umhverfisvænar umbúðir. Margar hjálparstofnanir hafa sýnt þessu áhuga, meðal annars Rauði krossinn. Þróunin er búin að taka tvö ár en í höndunum erum við nú með fullunna vöru sem hægt að nýta til manneldis.

Hermann Einarsson og Baldvin Ingimarsson.

[Fréttin birtist upphaflega 22. september 2010 kl. 19:00 á http://www.dv.is/frettir/2010/9/22/urgangur-nyttur-i-neydarpakka/. Höfundur er Trausti Hafsteinsson (trausti@dv.is).]


SIGLFIRÐINGUR.IS | Sími: 899 0278 | Netfang: sae@sae.is