Úr gulu í appelsínugult


Viðvörunarstig gærdagsins hefur verið hækkað úr gulu í appelsínugult fyrir höfuðborgarsvæðið, Suðurland, Faxaflóa, Breiðafjörð, Vestfirði, Strandir og Norðurland vestra, Norðurland eystra og Miðhálendið og er jafnvel búist við að Veðurstofan breyti því í rautt áður en langt um líður, en það yrði þá í fyrsta sinn hér á landi.

Á veðurspá- og veðurfréttavef sínum segir Einar Sveinbjörnsson veðurfræðingur í nýrri færslu um þessa nýju ákvörðun Veðurstofunnar:

„Ég er sammála því mati þeirra á Veðurstofunni.

Það er bæði veðurhæðin, en líka ofankoman, einkum norðanlands sem ræður því mati. Litur viðvörunar tekur bæði mið af líkindum eða styrk óveðurs saman með áhrifum á samfélag.

Sjáum á nýjasta spákorti Dönsku Veðurstofunnar sem reiknuð er yfir Íslandi í fínni upplausn vind í 100 m hæð yfir jörðu. Venjulega er hann sýndur fyrir 10 m og eðlilega er heldur minni veðurhæð nærri jörðu. Sýnir hins vegar vel við hverju má búast. Guli liturinn er þröskuldur yfir í 32 m/s í meðalvind. Í Svona stormi má ætla að vindur nær jörðu verði um 85-95% af þessum gildum. Hviður og truflanir frá fjöllum breyta myndinni heldur og snarpar strengir en þetta ná sums staðar til jarðar.

En takið líka eftir því hvað skilunum er spáð skörpum. Austan þeirra verður veður skaplegt. Óvissa er m.a. um legu skilanna, þó víst megi telja að annað kvöld og á miðvikudag haldi þau til austurs.“

Sjá hér.

Á þessari slóð hjá Vegagerðinni má sjá skema yfir áætlaðar lokanir vegna veðurs næstu daga. Ef veðurspá breytist – eða aðrar aðstæður – geta lokanir tekið mið af því. Eins er hugsanlegt að loka þurfi fleiri vegum en þeim sem þar eru nefndir.

Mynd: Veðurstofa Íslands.
Texti: Sigurður Ægisson │ [email protected]

image_print

SIGLFIRÐINGUR.IS | Sími: 899 0278 | Netfang: [email protected]