Ungur fálki á sveimi


Fálki hefur verið á sveimi í firðinum í nokkrar vikur og lifað hér í vellystingum, að sögn kunnugra. Í dag náðist hann loksins á mynd, þar sem hann hvíldi sig við Hlíðarveginn. Og ekki vantar að fallegur er hann.

Þessi kraftmikli og ófélagslyndi fugl er hánorrænn. Á Íslandi verpir hann um allt land, er hvergi algengur en einna mest af honum norðanmegin – í Dalasýslu, á Vestfjörðum, í Húnavatnssýslum, Skagafirði, Eyjafirði og Múlasýslum, að ógleymdum Þingeyjarsýslum. Erlendis verpir hann á Grænlandi, í Noregi, Svíþjóð, Finnlandi, Rússlandi, Kanada og Alaska; heildarfjöldinn er talinn vera 7,880-10,990 pör, þ.e.a.s. 1–1,5 á 1,000 ferkílómetra svæði. Hér á landi er þéttleikinn sennilega langmestur í heiminum.

Þegar ungarnir eru orðnir færir um að bjarga sér, um mánuði eftir að þeir eru orðnir fleygir, yfirgefa þeir varpstöðvarnar og leggjast í flakk. Þá er gjarnan leitað til strandar. Fyrsti veturinn er þeim býsna erfiður og afföll geta orðið mikil. Eftir það aukast lífslíkurnar.

Ungfuglarnir eru dekkri á lit en hinir fullorðnu og með bláleitar klær og nef, eins og þessi sem verið hefur hér að undanförnu. Tveggja ára gamlir eru þeir orðnir kynþroska, að talið er, og hafa klæðst endanlegum búningi. Nefrót og fætur eru þá orðin gul.

Mynd og texti: Sigurður Ægisson │ [email protected]

image_print

SIGLFIRÐINGUR.IS | Sími: 899 0278 | Netfang: [email protected]