Trausti á Sauðanesi látinn

Trausti Magnússon og Hulda Jónsdóttir

Trausti Magnússon, sem var lengi vitavörður á Sauðanesi, lést í gærmorgun á Hrafnistu í Reykjavík en hann varð 100 ára 13. ágúst á síðasta ári.

Trausti var fæddur í Kúvíkum við Reykjarfjörð í Strandasýslu og hét fullu nafni Trausti Breiðfjörð. Hann var næstelstur af fjórum börnum Magnúsar Hannibalssonar skipstjóra og Guðfinnu Guðmundsdóttur. Auk þriggja alsystkina átti Trausti sex hálfsystkini, samfeðra, en eitt þeirra varð 94 ára.

Hann var alinn upp á Gjögri, hóf sjóróðra með föður sínum átta ára gamall, flutti til Djúpavíkur átján ára og var á ýmsum skipum, lengst af skipstjóri á Hörpu, sem var meðal annars flóabátur á Húnaflóa. Hann bjargaði mönnum úr sjávarháska í desember 1948.

Trausti flutti að Sauðanesi við Siglufjörð árið 1959 og gerðist vitavörður í Sauðanesvita. Fyrstu átta ár Trausta á Sauðnesi var staðurinn ekki í vegasambandi og þurfti þá að ganga eftir tæpum götum fyrir Strákafjall til að komast til Siglufjarðar eða að fara yfir fjöll. Einnig var hægt að fara sjóleiðina, en lending var erfið. Hann flutti til Reykjavíkur um áttrætt.

Kona Trausta er Hulda Jónsdóttir en hún er orðin tæplega 98 ára. Síðustu ár bjuggu þau að Austurbrún 39 í Reykjavík en Trausti flutti á Hrafnistu í ágúst í fyrra. Fimm af sex börnum þeirra eru á lífi.

Á myndinni hér fyrir ofan eru Trausti og Hulda í heimsókn á Sauðanesi.

Mynd: Björn Valdimarsson │bjorn@bjornvald.is.
Texti: Jónas Ragnarsson │ jr@jr.is.

image_print


SIGLFIRÐINGUR.IS | Sími: 899 0278 | Netfang: sae@sae.is