Það sem bátsmaðurinn sagði

Laugardaginn 6. mars kl. 15.00 opnar Hulda Hákon sýningu í Kompunni, Alþýðuhúsinu á Siglufirði, og verður hún opin til 22. þessa mánaðar. Á sýningunni verða lítil málverk, lágmynd og texti sem tengjast sögum bátsmannsins. Bakvið eru frásagnir af stöðum þar sem himinn og haf mætast. Staðir sem segja frá fegurð, þrekvirkjum og viðleitni okkar til þess að treysta öryggi. Björgunarbátur, sigmaður, skipbrotsmannaskýli, þyrlupallur, forn ógn í hafinu, bauja, vitar og leitarhundur eru meðal myndefnisins.

Hulda er þekkt fyrir lágmyndir, texta og skúlptúra, en hefur líka fengist við málverk. Verkin eru unnin út frá stöðluðum stærðum málverka í Frakklandi á 19. öld. Sýningin í Kompunni er opin daglega milli kl. 14.00 og 17.00.

Myndir og texti: Aðsent.