Sýningin NÚLL verður opnuð í Árósum á laugardaginn kemur


Listamennirnir Arnar Ómarsson og Freyja Reynisdóttir hafa unnið saman síðastliðinn mánuð og munu opna sýninguna NÚLL við Institut for (X), Godsbanen, Árósum, næstkomandi laugardag, 27. september, kl. 20:00.  Léttar veitingar í boði en auk þess mun tónlistarmaðurinn Mads B. Sørensen sjá um að þeyta skífum fram á kvöld.

Sýningin mun svo standa opin dagana 28.-30. september, frá kl. 13:00-18:00.

Nánari upplýsingar má finna á: whyissomethingratherthannothing.com.

Verkefnið Núll er samstarf tveggja íslenskra, en ólíkra listamanna í Árósum, Danmörku. Hugmyndin um tómarúmið og alheiminn, það sem er ekkert og það sem er, dróg þau saman. Starandi út í himingeiminn var ákveðið að búa til ekkert. Verkefnið dregur upp mynd af óstjórnlegri skilgreiningaráráttu mannsins yfir fimm vikna tímabil sem lýkur laugardaginn næstkomandi. Verkefnið  hefur falið í sér listasmiðju, millilandasamstarf, bókverk og sýningu. Yfirlýst markmið er að búa til ekkert, sem kallar á grundvallar frumspekilega nálgun á hlutinn og orðið og verður útkoman til sýnis á Godsbanen i Aarhus i samstarfi við Reykjavíkurborg, SÍM, Myndstef, D.A.K, Institut for (X), Aarhus Center for Visual Arts, Háskóla Árósa og Lodret hönnunarstofu.

Freyja Reynisdóttir, fædd 1989, er íslenskur listamaður sem býr og starfar á Íslandi. Hún útskrifaðist 2014 með fyrstu einkunn frá Myndlistarskólanum á Akureyri. Freyja hefur unnið að verkefna- og sýningastjórnun, séð um eigin sýningaraðstöðu og tekið þátt í fjölbreyttum alþjóðlegum verkefnum. Verk hennar lýsa oft óvenjulegu ímyndunarafli sem fjallar um hinn tilfinningalega raunveruleika að vera meðal annarra, reynslu okkar, minni og samskipti. Hún vinnur yfirleitt þvert yfir marga miðla eins og teikningu, texta, gjörninga, málun, myndbandsverk, hljóðverk og innsetningar. Seinasta sýning hennar fjallaði um persónuleg vísindi og heimspeki á sér sjálfri, mannkyninu og banönum. Sjá nánar á: freyjareynisdottir.com.

Arnar Ómarsson, fæddur 1986, útskrifaðist 2011 með fyrstu eingunn frá University of the Arts, London og hefur síðan unnið sjálfstætt sem listamaður. Hann hefur opnað sýningar í Danmörku, Englandi, Brussel og víðsvegar á Íslandi og hlotið ríkisstyrki frá Íslandi og Danmörku. Í verkum Arnars er ákveðin áhersla á hreinskilna gagnrýni á hinu venjulega eða hefðbundna. Hann notast við marga mismunandi miðla til að færa skilaboðin til áhorfandans, og þar af mikið við innsetningar og myndverk. Nýlegar verkseríur hafa fjallað um samband mannsins við stórborgir, hvernig við höfum skapað tölvuna í okkar mynd og tengingu vísindaskáldskapar við raunverulegar framtíðarhorfur. Eðli mannsins er alltaf miðjupunkturinn og framkvæmdin er einföld og hreinskilin. Sjá nánar á: arnaromarsson.com.

Freyja Reynisdóttir og Arnar Ómarsson.

Kynningarveggspjaldið um opnun sýningarinnar.

Myndir og texti: Aðsent.


SIGLFIRÐINGUR.IS | Sími: 899 0278 | Netfang: sae@sae.is