Siglufjarðarpistill


Morgunblaðið birtir reglulega pistla fréttaritara sinna, í þætti sem nefnist Úr bæjarlífinu. Er þar reynt að bregða upp myndum úr heimabyggð og því sem fólk úti um land hefur verið og er að fást við hverju sinni. Þetta á að vera stutt og hnitmiðað og hefur undirritaður reynt að byrja hverju sinni þar sem frá var horfið. Þann 4. janúar og 10. september 2011, 28. janúar, 21. júlí og 10. nóvember 2012, 6. apríl, 17. ágúst og 14. desember 2013 var komið að Siglufirði. Einnig 17. maí og 15. nóvember 2014, sem og 21. mars og 24. október 2015, 19. mars og 1. október 2016, 11. febrúar 2017. Og svo í dag.

Þar segir:

  • Alþjóðleg ráðstefna um ljóstækni fór fram á Siglufirði fyrr á þessu ári, nánar tiltekið í maí. Hún bar yfirskriftina Dinamo 2017 og hana sóttu um 70 sérfræðingar alls staðar að úr heiminum. Nýsköpunarmiðstöð Íslands hafði veg og vanda að undirbúningi hennar og skipulagningu.
  • Fyrsta skemmtiferðaskip sumarsins kom til Siglufjarðar snemma morguns 19. maí. Það var Ocean Diamond sem lagðist að Óskarsbryggju. Komur skemmtiferðaskipa hingað urðu á fjórða tuginn í sumar.
  • Sama dag kom Sólberg ÓF 1 til hafnar í Siglufirði. Það var hannað af fyrirtækinu Skipsteknisk í Noregi og smíðað í Tersan-skipasmíðastöðinni í Tyrklandi. Það er tæpir 80 metrar að lengd, 15,4 metrar á breidd og alls 3.720 brúttótonn. Rými er fyrir allt að 1.200 tonn af afurðum á brettum í 1.900 rúmmetra frystilest. Auk þess er fullkomin mjölverksmiðja um borð, smíðuð í Héðni hf. Skipinu var formlega gefið nafn við hátíðlega athöfn daginn eftir heimkomuna.
  • Tvær framtakssamar göngukonur, þær Hulda Jakobína Friðgeirsdóttir og Gróa María Þórðardóttir, tóku sig til og komu fyrir gestabók í Hvanneyrarskál í byrjun sumars. Hún var sett í plastkassa við tröppur á suðurvegg gula hússins sem þar stendur. Öll þau sem leið áttu og eiga í skálina voru og eru hvött til að rita nöfn sín í bókina.
  • Fimmtudaginn 8. júní afhentu Bjarni og Jónas Sigurjónssynir Síldarminjasafninu bátinn Kríu í minningu afa síns, Jónasar Jónssonar Long frá Ólafsfirði. Nú eru alls varðveittir tólf bátar í Bátahúsinu og Krían sá langelsti.
  • Á þjóðhátíðardegi Íslendinga hófst flutningur íslenskra þjóðlaga úr turni Siglufjarðarkirkju. Tekinn var upp sami háttur og í fyrrasumar þegar spilaðar voru tvisvar á dag upptökur af söng félaga úr Kvæðamannafélaginu Rímu í Fjallabyggð. Sá flutningur mæltist vel fyrir meðal margra og skýr hvatning kom fram um að þessu yrði haldið áfram. Sjónarmiðið var að þessi alþýðutónlist færi vel í bæ sr. Bjarna Þorsteinssonar þjóðlagasafnara og úr kirkjunni sem hann átti svo mikinn þátt í að byggð var. Hvert lag tekur nálægt einni mínútu í flutningi kl. 12.30 og aftur kl. 18.15. Flytjendur eru Gústaf Daníelsson, Svanfríður Halldórsdóttir, Sigurður Hlöðvesson, Margrét Ásgeirsdóttir, Þorgeir Gunnarsson, Örlygur Kristfinnsson og nýir þátttakendur, Haukur Orri Kristjánsson og Hrafn Örlygsson, taka saman eina stemmu á föstudögum. Þessi verður haldið áfram út september.
  • Þann 11. júlí síðastliðinn sást ránþerna (Hydroprogne caspia) í Siglufirði, hélt meðal annars til við Langeyrartjörnina. Um er að ræða stærstu þernutegund í heimi, sem aldrei áður hafði sést á Íslandi, svo vitað sé. Í útliti og atferli minnir hún á kríu, fyrir utan það að fætur eru svartir, en ekki rauðir. Stærðin er hins vegar í líkingu við silfurmáf, lengdin 48-60 cm og vænghafið 127-145 cm. Þetta er sumsé mikið flykki.
  • Þann 18. júlí í fyrra náðist grjótkrabbi (Cancer irroratus) hér við Óskarsbryggju/Öldubrjót, sá fyrsti sem vitað er um í Siglufirði. Um var að ræða norður-ameríska tegund sem varð fyrst vart við Íslandsstrendur árið 2006, í Hvalfirði. Ísland er nyrsti og jafnframt eini þekkti fundarstaður hans í Evrópu til þessa. Annar náðist svo hér við bryggju 17. júlí á þessu ári, hinn þriðji 8. ágúst og síðan hafa fjórir bæst við: 24. ágúst, 25. ágúst, 27. ágúst og 31. ágúst. Tegundin er því ekkert á förum héðan, að því er virðist.
  • Vegurinn um Siglufjarðarskarð var lagfærður í ágúst og þá var loksins hægt að aka þar alla leið yfir, sem margur hafði þráð í nokkur ár, enda útsýni þaðan mikið og sérstök upplifun að vera þar. Var hann þó einungis fær vel útbúnum bifreiðum og reyndum ökumönnum, enda merktur sem torleiði beggja vegna.
  • Mánudaginn 28. ágúst átti Siglufjarðarkirkja 85 ára vígsluafmæli. Þann 16. maí 1931 hófust byggingarframkvæmdir og 29. júlí var steypuvinnu lokið á veggjum og lofti og ráðist í að steypa turninn. Hinn 15. ágúst 1931 var hornsteinninn lagður með viðhöfn en þá var kirkjan nær fokheld. Þegar svo Jón Helgason biskup vígði húsið, 28. ágúst 1932, var risin hér stærsta kirkja á Íslandi í þá daga, að Kristskirkju í Landakoti undanskilinni, sem hafði verið reist 1929.
  • Það gránaði í efstu brúnir siglfirsku fjallanna aðfaranótt mánudags, 11. september, einkum í austri og suðri. Annars hafði allan snjó tekið upp í Nesnúp þetta sumarið, sem ekki er algengt, og í Skollaskál var síðasti skaflinn við það að hverfa, sem óvíst er að verði úr þessu.
  • Siglufjörður á 100 ára kaupstaðarafmæli 20. maí á næsta ári. Af því tilefni verður Norræna strandmenningarhátíðin haldin hér dagana 4.-8. júlí. Strandmenningarhátíðin hefur verið haldin árlega frá árinu 2011 og hafa Norðurlöndin skipt með sér hlutverki gestgjafa.
  • Á afmælisárinu er jafnframt ráðgert að taka í notkun nýjan og glæsilegan golfvöll í Hólsdalnum, sem verið hefur í byggingu síðan 2012. Er um að ræða 9 holu völl, sem mun m.a. teygja sig inn í Skarðdalsskóg, nyrsta skóg á Íslandi.

Mynd og texti: Sigurður Ægisson | sae@sae.is.


SIGLFIRÐINGUR.IS | Sími: 899 0278 | Netfang: sae@sae.is