Selnes-, Selvíkurnefs- eða Staðarhólsviti


Árið 1911 var settur upp stólpaviti við Siglufjörð til að lýsa leiðina
inn fjörðinn að höfninni. Þessi gasviti var sömu gerðar og vitarnir sem
komið var fyrir á Skarfasetri á Reykjanesi og Öndverðarnesi árið 1909 og
á Langanesi árið 1910.

Selvíkurnefsviti austanvert við Siglufjörð var byggður árið 1930 á
kostnað hafnarsjóðs Siglufjarðarhafnar. Á honum er 3 m hátt áttstrent
norskt ljóshús úr járnsteypu. Í það voru látin díoptrísk 375 mm linsa og
gasljóstæki. Árið 1961 var vitinn rafvæddur með orku frá ljósavélum og
gastækin tekin úr notkun. Árið 1975 voru gasljóstækin aftur tekin í
notkun og þá til vara til ársins 1990. Þá var hætt að nota ljósavél og
gas en einnota rafgeymar settir í staðinn. Jafnframt var skipt um linsu í
vitanum og sett í hann plastlinsa. Vitinn var sólarorkurafvæddur árið
2001.

Árið 1960 var settur upp radíóviti í timburskúr nærri vitanum og
ljósavélar í öðrum skúr þar nærri. Fáum mánuðum síðar voru skúrar og
tæki flutt að Arnarnesi við Ísafjarðardjúp og reynd þar. Árið eftir voru
sömu tæki aftur sett upp við Selvíkurnefsvita en ljósavélunum komið
fyrir inni í vitanum. Radíóvitinn var loks lagður niður árið 1975.

Selvíkurnefsviti er steinsteyptur ferstrendur turn, 5,5 m hár og 3×3 m
að grunnfleti. Á turnveggjum eru fjórir krosspóstagluggar, stallað
þakskepp efst með steinsteyptu handriði, settu bogagötum. Á anddyri eru
tvennar dyr og einn gluggi en yfir því bárujárnsklætt skúrþak. Vitinn
var hvítur upphaflega, með rauða lóðrétta rönd á miðjum vegg, en var
síðar allur málaður gulur.

Teikning að Selvíkurnefsvita við Siglufjörð sem byggður var 1930,

gerð í
mkv. 1:50 og 1:20, hér sýnd í mkv. 1:200 og 1:80.

Þarna er hann reyndar kallaður Staðarhólsvitinn.

Selvíkurnefsviti

Innsiglingarviti í eigu sveitarfélags og umsjón Siglufjarðarhafnar.

Staðsetning: 66°09,6? n.br., 18°52,0? v.lgd.

Ljóseinkenni: Fl WRG 5 s.

Ljóshorn: Hvítt 027°-077° yfir leguna. Grænt 077°-153° yfir Sauðanes.
Hvítt 153°-160° yfir fjarðarmynnið. Rautt 160°-205° yfir Helluboða.

Sjónarlengd: 13 sjómílur.

Ljóshæð yfir sjávarmáli: 20 m.

Vitahæð: 8,5 m.

Byggingarár: 1930, tekinn í notkun 1931.

Byggingarefni: Steinsteypa.

Hönnuður: Benedikt Jónasson verkfræðingur.

Vitaverðir

Gísli Guðnason

Haukur Gíslason

fæddur 16.10. 1903

fæddur 27.09. 1925

1942-1982

1982-1984

Selnes-, Selvíkurnefs- eða Staðarhólsviti um vetur.

Og að sumri til.

[Orðréttur kafli úr bókinni
Vitar á Íslandi
. Höfundar eru Guðmundur
Bernódusson, Guðmundur L. Hafsteinsson og Kristján Sveinsson, og útgefandi
Siglingastofnun Íslands, Kópavogi, 2002. Endurbirt hér með leyfi.]

Ljósmyndir: Sigurður Ægisson | sae@sae.is


SIGLFIRÐINGUR.IS | Sími: 899 0278 | Netfang: sae@sae.is