Sauðanesviti vestan Siglufjarðar


Árin 1933-1934 var byggður ljós- og hljóðviti á Sauðanesi, vestan mynnis
Siglufjarðar. Fyrir vitavörð var klætt bárujárnsklætt timburhús, hæð og
ris, á steinsteyptum kjallara og útihús. Á Sauðanesvita er 4 m hátt
sænskt ljóshús með eirþaki en veggir eru steinsteyptir. Vitinn var
útbúinn með 125° díoptískri 500 mm linsu og gasljóstækjum. Hann var
raflýstur árið 1961 með straumi frá ljósavélum en gas haft til vara til
ársins 1995. Þá var sett varapera í vitann, tengd rafgeymum.

Hljóðvitinn var einnig tekinn í notkun árið 1934 og sendi í þoku og
dimmviðri þrjú hljóðmerki á mínútu. Hljóðmerkin voru: hljóð 2 sek. +
þögn 5 sek. + hljóð 2 sek. + þögn 5 sek. + hljóð 2 sek. + þögn 44 sek.
Hljóðvitinn var tekinn úr notkun árið 1992.

Vitarnir á Sauðanesi voru í tveimur turnum. Í þeim lægri, sem er nær
sjónum, var hljóðvitinn en ljósvitinn er í þeim hærri. Á þeim báðum er
stallað þakskegg og steinsteypt handrið með bogadregnum opum. Við efri
hlið ljósvitans er lágreist varðstofa og við hana og vitaturnana báða er
anddyri. Vélasalur og olíugeymsla eru í einnar hæðar viðbyggingu með
lágu risþaki.

Á sjávarbakkanum neðan við vitann er vélknúið spil með gálga og bómu sem
notuð var til að draga upp efni og nauðsynjar. Búnaður þessi var
upphaflega settur upp í Aðalvík á Hornströndum af breska setuliðinu sem
hafði þar bækistöðvar í síðari heimsstyrjöldinni.

Árið 1966 var fullt starf vitavarðar lagt niður og hætti Vitastofnun að
bera kostnað af búsetu vitavarðar á jörðinni Engidal á Sauðanesi og tók
hann jörðina á leigu.

Teikning að ljós- og hljóðvita sem byggður var á Sauðanesi 1933-1934

gerð í mkv. 1:50, hér sýnd í mkv. 1:200. 

Sauðanesviti nyrðri

Landtökuviti í eigu og umsjón Siglingastofnunar Íslands.

Staðsetning: 66°11,2´ n.br., 18°57,1´ v.lgd.

Ljóseinkenni: Fl(3) WR 20 s.

Ljóshorn: Rautt fyrir austan 075° yfir Hammersboða. Hvítt 075°-221°. Rautt fyrir austan 221° yfir Helluboða.

Sjónarlengd: 16 sjómílur.

Ljóshæð yfir sjávarmáli: 37 m.

Vitahæð: 10,5 m.

Byggingarár: 1933-1934.

Byggingarefni: Steinsteypa.

Hönnuður: Benedikt Jónasson verkfræðingur.

Vitaverðir

Jón Helgason

Oddur Oddsson

Ágúst Bjarnason

Trausti Magnússon

Hulda Jónsdóttir

Jón Trausti Traustason

fæddur 25.04. 1896

fæddur 22.07. 1894

fæddur 10.09. 1909

fæddur 13.08. 1918

fædd    10.03. 1921

fæddur 27.01. 1965

starfstími    1934-1952

starfstími    1952-1955

starfstími    1955-1958

starfstími    1958-1988

starfstími    1989-1991

starfstími    1991-

Sauðanesviti um vetur.

Og að sumri til.

 

[Orðréttur kafli úr bókinni
Vitar á Íslandi
. Höfundar eru Guðmundur
Bernódusson, Guðmundur L. Hafsteinsson og Kristján Sveinsson, og útgefandi
Siglingastofnun Íslands, Kópavogi, 2002. Birt hér með leyfi.]

 

Ljósmyndir: Sigurður Ægisson | sae@sae.is


SIGLFIRÐINGUR.IS | Sími: 899 0278 | Netfang: sae@sae.is