Richard Andersson NOR


Í kvöld, föstudaginn 21. apríl, kl. 21.00, mun djasstríó „Richard Andersson NOR“ vera með tónleika í Alþýðuhúsinu á Siglufirði. Sveitina skipa Richard Andersson, bassi, Óskar Guðjónsson, saxófónn og Matthías Hemstock, trommur.

Árið 2013 flutti danski bassaleikarinn og tónskáldið Richard Andersson til Íslands til að kynna sér menningu og tónlistarsenu landsins. Hann tengdist fljótlega öðru tónlistarfólki þar á meðal saxófónleikaranum Óskari Guðjónssyni og trommuleikaranum Matthíasi Hemstock. Síðan þá hafa þeir starfað saman undir nafninu „Richard Andersson NOR“.

Tríóið hefur á efnisskránni lög eftir Richard og Óskar sem einkennast af skýrri og hnitmiðaðri lagrænni sýn. Um leið er hljóðfæraleikurinn margbrotinn og fer á köflum út fyrir hefðbundin mörk. Markmið þessara þriggja tónlistarmanna er að flytja lög sem eru í grunninn melódísk og ljóðræn en gefa þeim um leið tækifæri til að leita inn á tilraunakenndari svið í persónulegri nálgun sinni.

Eftir þrjú ár og rúmlega 60 tónleika í Færeyjum, Íslandi og Danmörku er komið að útgáfu fyrstu hljómskífu tríósins sem fer af því tilefni í tónleikaferð um Vestfirði og Norður- og Suðvesturland í apríl og leikur á eftirtöldum stöðum:

18. apríl: Danska Sendiráðið í Reykjavík (aðeins fyrir boðsgesti).
19. apríl: Edinborgarhúsið á Ísafirði.
20. apríl: Hof, Akureyri.
21. apríl: Alþýðuhúsið, Siglufirði.
22. apríl: Jazzhátíð Garðabæjar.
23. apríl: Bryggjan Kaffihús, Grindavík.

Mynd og texti: Aðsent.


SIGLFIRÐINGUR.IS | Sími: 899 0278 | Netfang: sae@sae.is