Rekstrarafgangur 177 milljónir


Fjárhagsáætlun bæjarsjóðs Fjallabyggðar fyrir árið 2017 var samþykkt á bæjarstjórnarfundi í gær, 18. nóvember 2016. Áætlaður rekstrarafgangur bæjarsjóðs fyrir árið 2017 er 177 milljónir króna. Þetta kemur fram í fréttatilkynningu sem var að berast. Helstu niðurstöðutölur áætlunarinnar eru:

  • Útsvarsprósenta er 14,48% og álagningarprósenta fasteignagjalda er óbreytt á milli ára.
  • Skatttekjur ársins 2017 eru áætlaðar 1.178 m.kr., en útkomuspá ársins 2016 er 1.167 m.kr.
  • Heildartekjur 2017 verða 2.254 m.kr., en eru áætlaðar 2.225 m.kr. í útkomuspá 2016.
  • Gjöld ársins 2017 eru áætluð 2.053 m.kr., en eru 2.084 m.kr. fyrir árið 2016.
  • Áætluð rekstrarstaða ársins 2017 er jákvæð um 177 m.kr.
  • Heildareignir sveitarfélagsins eru áætlaðar 4.440 m.kr. og eigið fé er 2.658 m.kr. eða 60% eiginfjárhlutfall.
  • Skuldir og skuldbindingar hækka aðeins á milli ára, sem eru tilkomnar vegna hækkunar lífeyrisskuldbindinga og eru áætlaðar 1.782 m.kr. Skuldaviðmið bæjarsjóðs er áætlað 67% fyrir 2017.
  • Vaxtaberandi skuldir eru 479 m.kr. og eru óbreyttar á milli ára, en voru 536 m.kr. árið 2015.
  • Veltufé frá rekstri er áætlað tæplega 400 m.kr., sem er tæplega 18% og framlegðarhlutfall er ríflega 15%.
  • Framkvæmt verður fyrir 321 m.kr. ásamt stækkun MTR, sem er sameiginlegt verkefni Fjallabyggðar, sveitarfélaga á Eyjafjarðarsvæðinu og ríkisins.
    Helstu framkvæmdir eru:
    a) Skólar og leikskólar 62.0 m.kr.
    b) Yfirlagnir malbiks og götur 63.0 m.kr.
    c) Holræsakerfi 105.0 m.kr.
    d) Bæjarbryggja 35.0 m.kr.
    e) Viðbygging MTR 80.0 m.kr.

Í lok fréttatilkynningarinnar segir að rekstur bæjarfélagsins Fjallabyggðar sé mjög traustur, þrátt fyrir lægri skatttekjur en á árinu á undan, sem orsakast hafi af lægra fiskverði og þar af leiðandi lægri tekjum hafnarsjóðs og sjómanna. Þá hafi sveitarfélög þurft að taka á sig miklar launahækkanir frá árinu 2015.


SIGLFIRÐINGUR.IS | Sími: 899 0278 | Netfang: sae@sae.is