Ragnar Jónasson kynnir Myrknætti á Siglufirði í dag


Glæpasagan Myrknætti kom út í gær. Höfundurinn, Ragnar Jónasson, er væntanlegur til Siglufjarðar í dag, föstudag, og mun hitta lesendur og árita bækur í Samkaupum/Úrvali á milli kl. 16.00 og 18.00. Eins og fram hefur komið gerist nýja bókin að miklu leyti á Siglufirði og er sjálfstætt framhald Snjóblindu.

Ragnar er nýkominn af bókamessunni í Frankfurt þar sem Fischer Verlage útgáfusamsteypan kynnti þýska útgáfu Snjóblindu, sem kallast Schneebraut þar í landi. Bókinni hefur verið hampað í þýsku pressunni og á vefsíðu stórblaðsins Spiegel (Spiegel Online) var fjallað um bókina í tilefni af bókamessunni. Þar sagði að fléttan væri vel heppnuð og að þetta væri sígild morðgáta þar sem heill leikflokkur lægi undir grun. ?Og í lokin reynist sá seki ekki einn af þeim sem maður hafði búist við. Hvað getur maður beðið um meira,? sagði Spiegel Online. Eschborner Stadtmagazine í Þýskalandi sagði meðal annars um bókina: ?Frábært verk til að kynnast Íslandi, landinu sem í ár er gestur Bókamessunnar.? Bókabloggari einnar elstu bókabúðar heims, Die Orell Füssli í Sviss, lofaði bókina líka og sagði m.a.: ?Sérstaða bókarinnar í felst andrúmsloftinu í dimmum smábæ en hinir raunverulegu töfrar koma fram í tungutakinu, sem er ljáð flestum persónunum.? Það er því óhætt að segja að Siglufjörður sé tekinn að vekja athygli í hinum þýskumælandi heimi.

Ragnar Jónasson mun hitta lesendur og árita bækur í Samkaupum/Úrvali í dag, á milli kl. 16.00 og 18.00.

Þessi ljósmynd var tekin af honum fyrr í sumar.


Mynd: Sigurður Ægisson | sae@sae.is.


Texti: Aðsendur.


SIGLFIRÐINGUR.IS | Sími: 899 0278 | Netfang: sae@sae.is