Opið hús hjá Leikskólum Fjallabyggðar


Leikskólar Fjallabyggðar – Leikhólar í Ólafsfirði og Leikskálar
í Siglufirði – verða með opið hús mánudaginn 7.  febrúar í tilefni af Degi leikskólans
sem ber nú upp á sunnudag, 6. febrúar. Leikskólarnir verða opnir frá kl.
08.00 til kl. 16.00. Eru bæjarbúar hvattir til að koma í heimsókn og
fylgjast með því frábæra starfi sem fram fer í leikskólunum okkar.
Foreldrar, ömmur, afar, systkini og aðrir bæjarbúar eru velkomin að
skoða starfið og hitta kennara og börn í skemmtilegu spjalli.

6. febrúar er merkilegur dagur í
íslenskri leikskólasögu því þann dag árið 1950 stofnuðu frumkvöðlar
leikskólakennara fyrstu samtök sín og var því fagnað í fyrra á 60 ára
afmæli félagsins.

Dagur leikskólans verður nú haldinn í
fjórða sinn; leikskólakennarar og annað starfsfólk leikskóla hafa á
undanförnum árum, ásamt börnunum, gert daginn eftirminnilegan á margan
hátt.

Dagur leikskólans er samstarfsverkefni
Félags leikskólakennara, Mennta- og menningarmálaráðuneytis, Sambands
íslenskra sveitarfélaga og Heimilis og skóla. Tilgangurinn er að auka
jákvæða umræðu um leikskólann, vekja umræðu um hlutverk leikskóla og
starf leikskólakennara og kynna starfið út á við.

Opið hús verður í leikskólum Fjallabyggðar á morgun, frá kl. 08.00-16.00.

Mynd: Fengin af Netinu.

Texti: Kristín María Hlökk Karlsdóttir.


SIGLFIRÐINGUR.IS | Sími: 899 0278 | Netfang: sae@sae.is