Munum eftir smáfuglunum


Það er kalt um allt land þessa dagana og snjór yfir öllu. Er fólk því eindregið hvatt til að gauka einhverju að smáfuglunum, þeir eiga erfitt með að finna sér eitthvað í gogginn í þessum jarðbönnum.

Fyrir þresti og fleiri tegundir má setja út kramda og saxaða afganga af næstum öllum mat og séu tré í görðum er ágætt að festa epli og perur á kvisti eða greinar eða setja á nagla, sem búið er að koma fyrir á hentugum stöðum þar. Þannig hverfa ávextirnir síður undir fönn, auk þess sem kettir eiga erfiðara með að næla sér í bráð. Hafi gleymst að kaupa epli hefur undirritaður bjargað sér á að gera eggjaköku og setja í hana brauðmola, rúsínur og þvíumlíkt og steypa þetta saman með því að bræða lambatólg, hella henni yfir og leyfa henni að harðna vel áður en afurðin er borin út. Einnig er smjör vinsælt, eitt og sér. En grænmeti líkar þeim ekki.

Ekki fleygja restinni af lambalærinu eða -hryggnum í sorpið, frekar út í garð. Það kann að bjarga mörgum fuglinum.

Fyrir snjótittlinga og dúfur er kornmeti (maískurl og þvíumlíkt) vel þegið, sem og brauð. Þrestir eru reyndar líka sólgnir í það hvort tveggja.

Auðnutittlingar þiggja smærri fræ (birkifræ, chiafræ, finkufóður, páfagaukafóður, hirsi o.s.frv.) og sólblómafræ.

Og fyrir þau sem gefa hrafninum étur hann flest sem býðst, ekki síst feitmeti.

Best er að dreifa matnum um svæðið, til að sem flestir geti nýtt sér. Í heimi fuglanna er það nefnilega stundum eins og víðar, að sá frekasti hrekur aðra í burtu, ef naumlega er skammtað.

Mynd: Mikael Sigurðsson.
Texti: Sigurður Ægisson │ [email protected] 

image_print

SIGLFIRÐINGUR.IS | Sími: 899 0278 | Netfang: [email protected]