Minni umferð um Héðinsfjarðargöng


– minnkar eftir mikla umferð fyrstu helgarnar

Smám saman dregur úr umferð í Héðinsfjarðargöngum. Frá 28. október til
21. nóvember 2010 hafa að meðaltali farið um 381 bíll/sólarhring um
bæði göngin. Skiptist þannig að 389 bílar/sólarhring hafa farið um
Ólafsfjarðargöng (þ.e.a.s. þann hluta Héðinsfjarðarganga) en 375
bílar/sólarhring um Siglufjarðargöng (hinn hlutann). Teljari í miðjum
Héðinsfirði mælir síðan u.þ.b. meðaltal þessara beggja þ.e 380
bílar/sólarhring.

Það vekur athygli að meðalumferð um Múlagöng er aftur á móti minnst á
sama tíma, eða 354 bílar/sólarhring. Meðalumferð um Múlagöng var 332
bílar/sólarhring fyrir sama tímabil árið 2009 eða einungis 6,6% undir
núverandi meðalumferð. Álag á Múlagöng virðist því ekki vera að aukast svo
mikið, sé miðað við þessar mælingar.

Auðvitað er hér um mjög stutt tímabil að ræða en lítill munur milli
umferðartalna 2010 og 2009 um Múlagöng gætu gefið vísbendingar um að
umferðin um Héðinsfjarðargöng sé að lang stærstum hluta milli
bæjarkjarnanna tveggja, Ólafsfjarðar og Siglufjarðar. Sé hins vegar horft
á línurit fyrir umferð eftir dögum (sjá graf hér fyrir neðan), sést að
mikil fylgni er milli umferðar um Héðinsfjörð og Múlagöng; þá mætti
sömuleiðis draga þá ályktun að um sömu umferðina/ökutækin væri að ræða,
þ.e. gegnumstreymisumferð um Ólafsfjörð. Einnig gæti verið að
akstursmynstrið sé svipað, þótt ekki sé um sömu umferð að ræða.

Klukkustundardreifingin (neðra grafið) er mjög svipuð milli
talningastaða í Héðinsfjarðargöngum, enda um sömu umferðina að ræða. Að
þessu sinni höfum við ekki klukkustundardreifingu um Múlagöng, því er
ekki hægt að bera þær við hér. Verður hægt við næsta aflestur. Þá verður
fróðlegt að sjá hvort umferðin um Múlagöng dreifir sér svipað yfir
sólarhringinn og um Héðinsfjörðinn. Það ætti að gefa enn frekari
vísbendingar um fylgnina milli Héðinsfjarðarganga og Múlaganga.

Gangamunninn Siglufjarðarmegin.

[Þessi
frétt birtist upphaflega á
http://www.vegagerdin.is/upplysingar-og-utgafa/frettir/nr/2482
30.11. 2010; önnur ljósmynd er þó notuð hér.]

Mynd: Sigurður Ægisson | sae@sae.is


Texti og gröf: Vegagerðin
| vegagerdin@vegagerdin.is

image_print

SIGLFIRÐINGUR.IS | Sími: 899 0278 | Netfang: sae@sae.is