KF lagði Fjarðabyggð


?Það var töluverður vindur á Ólafsfirði þegar KF tók á móti Fjarðabyggð á
mjög góðum Ólafsfjarðarvelli. Völlurinn kom vel undan vetri og er
væntanlega besti völlurinn á Norðurlandi um þessar mundir, þrátt
fyrir kuldatíð síðustu misserin,? segir í aðsendum texta þar sem
Þorvaldur Þorsteinsson fjallar um leik KF og Fjarðabyggðar sem fór fram í
gær.

Og áfram segir: ?En þá að leiknum sjálfum. Heimamenn léku með vindinn í bakið í fyrri hálfleik og byrjuðu mun betur. Milos fyrirliði heimamanna fékk dauðafæri strax á þriðju mínútu eftir hornspyrnu. Hann fékk boltann nokkuð óvænt og virtist auðveldara að skora en hitt en varnarmenn Fjarðabyggðar gerðu vel og komust fyrir skot Milosar.

Heimamenn voru líklegri til að byrja með enda með vindinn í bakið og bökkuðu leikmenn Fjarðabyggðar nokkuð, en voru þó að reyna að spila boltanum með jörðunni og gekk það alveg ágætlega. Þeir voru nokkuð hættulegir, sérstaklega eftir föst leikatriði.

Ragnar Hauksson hefur skorað í öllum deildarleikjum sínum hingað til og var ekki nein breyting á því þennan leikinn því eftir 27 mínútur geystist Milan Lazarevic fram vinstri vænginn og vippaði boltanum mjög snyrtilega á Ragnar sem var einn í teignum og skallaði fram hjá Amir Mehica, sem þó gerði ágæta tilraun til þess að verja. Heimamenn þjörmuðu að gestunum á þessum tímapunkti og átti Ragnar Hauksson fasta hælsendingu inn fyrir vörn gestanna eftir gott samspil heimamanna. Þórður Birgisson komst einn í gegn eftir þessa glæsisendingu Ragnars, hlaup af sér gestina og kláraði færið örugglega fram hjá Amir í marki Fjarðabyggðar. Staðan því 2-0 og þannig var hún í hálfleik.

Leikmenn Fjarðabyggðar komu grimmir til seinni hálfleiks með vindinn í bakið og voru staðráðnir í að jafna leikinn. Heimamenn bökkuðu og leyfðu andstæðingunum að stjórna leiknum.

Sigurjón Egilsson kom inn á í hálfleik fyrir Martin Rosenthal og kom nokkur kraftur með þeirri skiptingu. Eins var markakóngur Fjarðabyggðar, Mirnes Smalovic, mjög ógnandi frammi. Andri Hjörvar Albertsson átti gott skot strax í byrjun seinni hálfleiks sem sleikti stöngina og voru heimamenn nokkuð heppnir þar.

Glæsilegasta mark leiksins leit svo dagsins ljós á 59. mínútu þegar Jóhann Ragnar Benediktsson minnkaði muninn fyrir gestina. Jóhann fékk boltann rétt fyrir aftan miðju, lék boltanum aðeins áfram og þrumaði á markið. Skotið var gríðarlega fast og Halldór markmaður heimanna var heldur framarlega, sem gerði það að verkum að boltin söng í netinu. Gríðarlega fallegt mark hjá Jóhanni. Við þetta myndaðist smá panik í liði heimamanna og gestirnir virkuðu nokkuð líklegir til þess að jafna án þess þó að skapa sér nein dauðafæri.

Það var svo þegar  10 mínútur voru eftir að Gabríel Reynisson gerði út um leikinn þegar hann náði að komast í gegnum vörn heimamanna sem náðu þó að þrengja verulega að honum, þannig að færið virtist vera að renna út í sandinn en Gabríel náði þó þokkalegu skoti sem fór undir Amir í marki gestanna við mikinn fögnuð heimamanna en Amir hefði viljað gera betur í að verja skotið.

Til að strá salti í sárin skoraði besti maður vallarins, Ragnar Hauksson, sitt annað mark og fjórða mark heimamanna þegar um 3 mínútur lifðu eftir af venjulegum leiktíma. Markið kom eftir barning í teig gestana.

Valdimar Pálson, dómari leiksins, flautaði síðan til leiksloka en Valdimar átti góðan dag og bar mjög lítið á honum inni á vellinum. Heimamenn lönduðu nokkuð þægilegum sigri á toppliði deildarinnar.?

 

Ragnar Hauksson í ati.

Mynd: Aðsend.


Texti: Þorvaldur Þorsteinsson
| thorvald@vis.is


SIGLFIRÐINGUR.IS | Sími: 899 0278 | Netfang: sae@sae.is