Jarðbönn


Það er kalt fyrir norðan þessa dagana og éljagangur og snjókoma og mikill vindur í kortunum fram í miðja viku og jafnvel lengur.

Er fólk eindregið hvatt til að gauka einhverju að smáfuglunum. Þeir geta litla björg sér veitt í þessum jarðbönnum. Fyrir þresti og fleiri tegundir má setja út kramda og saxaða afganga af næstum öllum mat og séu tré í görðum er ágætt að festa epli og perur á kvisti eða greinar eða setja á nagla, sem búið er að koma fyrir á hentugum stöðum þar. Þannig hverfa ávextirnir síður undir fönn, auk þess sem kettir eiga erfiðara með að næla sér í bráð. Fyrir snjótittlinga og dúfur er kornmeti (maískurl, heilhveiti og þvíumlíkt) vel þegið, sem og brauðmolar. Auðnutittlingar þiggja smærri fræ (finkufóður, páfagaukafóður, hirsi o.s.frv.) sem og sólblómafræ. Og fyrir þau sem gefa hrafninum étur hann flest sem býðst, ekki síst feitmeti. Reyndar er brytjaður mör vinsæll hjá flestöllum ofannefndra tegunda, ekki síst ef kalt er í veðri.

Best er að dreifa matnum um svæðið, til að sem flestir geti nýtt sér. Í heimi fuglanna er það nefnilega stundum eins og víðar, að sá frekasti hrekur aðra í burtu, ef þröngt er skammtað.

Á Hvanneyrarhólnum er í dag búið að vera margréttað fyrir um 50 glorhungraða skógarþresti: afgangur af brauðtertu og lambakjöti gærkvöldsins, epli, bananar (hýðið líka), kiwi, matarbrauð, skorið í litla teninga, rifinn ostur, rúsínur, soðin bleikja og makríll, hvort tveggja maukað, steikingarfeiti, sætar kartöflur og vínber. Og í gær fengu þeir að auki bjúgu og lifrarpylsu, ásamt því öðru sem til féll.

Af þessu má sjá, að margt getur nýst fuglunum til bjargar uns Kári sleppir endanlega tökunum.

Oft var þörf en nú er nauðsyn.

Koma svo.

Mynd og texti: Sigurður Ægisson | sae@sae.is.

image_print


SIGLFIRÐINGUR.IS | Sími: 899 0278 | Netfang: sae@sae.is