Íþróttamaður Fjallabyggðar 2015


Kjörið á íþróttamanni Fjallabyggðar árið 2015 fór fram þriðjudaginn 29. desember en það voru Kiwanisklúbburinnn Skjöldur og Ungmennafélag Fjallabyggðar (UÍF) sem stóðu fyrir valinu.

Hvert aðildarfélag tilnefndi allt að þrjá iðkendur í kjörinu á íþróttamanni hverrar greinar (19 ára og eldri) en þeir sem urðu fyrir valinu voru eftirtaldir:
Blakmaður ársins: Sigurlaug Guðbrandsdóttir frá Glóa.
Boggiamaður ársins: Hrafnhildur Sverrisdóttir frá Snerpu.
Golfmaður ársins: Bergur Rúnar Björnsson frá GÓ.
Knapi ársins: Finnur Ingi Sölvason frá Glæsi.
Knattspyrnumaður ársins: Halldór Ingvar Guðmundsson frá KF.
Skíðamaður ársins: Sævar Birgisson frá SÓ.

Íþróttamaður ársins var síðan valinn en í valinu voru allir þeir sem tilnefndir voru. Fyrir valinu varð Finnur Ingi Sölvason frá hestamannafélaginu Glæsi en Finnur stóð sig frábærlega á fjölmörgum hestamannamótum á árinu og vann til fjölda verðlauna á þeim. Finnur Ingi er vel að titlinum kominn.

Aðildarfélögin tilnefndu líka unga og efnilega iðkendur í báðum kynjum og fengu fjölmargir viðurkenningu fyrir flottan árangur.

Hjónin Rósa Jónsdóttir og Sigurbjörn Þorgeirsson voru heiðruð fyrir óeigingjarnt starf í þágu íþróttamála í Fjallabyggð en þau hafa unnið frábært starf fyrir Golfklúbb Ólafsfjarðar. Rósa er formaður félagsins og búin að vera það í yfir 10 ár ásamt því að sitja í stjórn Golfsambands Íslands. Sigurbjörn er í stjórn golfklúbbsins og hefur komið að þjálfun barna og unglinga undanfarin ár.

Nýjung í kjörinu er að veita íþróttamanni sem alist hefur upp í Fjallabyggð, gengið í gegnum barna- og unglingastarf aðildarfélags, en flust á brott af einhverjum ástæðum og þurft að skipta um félag, viðurkenningu. Fyrir valinu varð knattspyrnukonan Sandra Sigurðardóttir en hún hefur frá árinu 2002 verið aðalmarkmaður síns félags. Sandra hefur frá 2004 spilað með Stjörnunni og unnið þrjá Íslandsmeistaratitla, tvo bikarmeistaratitla og tvisvar orðið meistari meistaranna ásamt fleiri smærri titlum. Sandra hefur spilað nokkra landsleiki fyrir Íslands hönd og á landsleiki í öllum aldursflokkum. Sandra er frábær íþróttamaður og verðug þessarar viðurkenningar.

Við óskum öllum þeim sem hlutu viðurkenningu á hátíðinni til hamingju með árangurinn en einnig öllum þeim íþróttaiðkendum í aðildarfélögum UÍF sem hafa staðið sig mjög vel á árinu.

Rósa Jónsdóttir.

Hin sem viðurkenningu hlutu.

Myndir og texti: Aðsent.



SIGLFIRÐINGUR.IS | Sími: 899 0278 | Netfang: sae@sae.is