Hvítt í fjöllum


Það er nokkuð ljóst að veturinn er innan seilingar. Hvítt var efst í
fjöllum í Siglufirði í dag og veðurspáin gerir ráð fyrir 3-8°C hita á
morgun og 4-5°C á sunnudag. En þótt hrollur fari um margan líkamann við tilhugsunina, er ekkert annað að gera er líta á björtu hliðarnar.

Þá getum við t.d. farið að hlakka til að sjá dans norðurljósanna á komandi mánuðum.

Það er ekki svo lítið.

Eða hversu líst fólki þetta kvæði Einars Benediktssonar, eitt af hátindum íslenskrar ljóðlistar?

Norðurljós

Veit duftsins son nokkra dýrlegri sýn


en drottnanna hásal í rafurloga?


Sjá grundu og vog undir gullhvelfdum boga!

? 
Hver getur nú unað við spil og vín? 


Sjálf moldin er hrein eins og mær við lín, 


mókar í haustsins visnu rósum. 


Hvert sandkorn í loftsins litum skín, 


og lækirnir kyssast í silfurósum. 


Við útheimsins skaut er allt eldur og skraut


af iðandi norðurljósum.

Frá sjöunda himni að ránar rönd


stíga röðlarnir dans fyrir opnum tjöldum,


en ljóshafsins öldur, með fjúkandi földum, 


falla og ólga við skuggaströnd. 


Það er eins og leikið sé huldri hönd


hringspil með glitrandi sprotum og baugum.

?
 Nú mænir allt dauðlegt á lífsins lönd


frá lokuðum brautum, frá myrkum haugum, 


og hrímklettar stara við hljóðan mar


til himins, með kristallsaugum.

Nú finnst mér það allt svo lítið og lágt, 


sem lifað er fyrir og barizt á móti. 


Þó kasti þeir grjóti og hati og hóti, 


við hverja smásál ég er í sátt.


Því bláloftið hvelfist svo bjart og hátt.

Nú brosir hver stjarna, þótt vonirnar svíki,


og hugurinn lyftist í æðri átt,


nú andar guðs kraftur í duftsins líki. 


Vér skynjum vorn þrótt, vér þekkjum í nótt


vorn þegnrétt í ljóssins ríki. ?

Hve voldugt og djúpt er ei himinsins haf


og hásigldar snekkjur, sem leiðina þreyta. 


Að höfninni leita þær, hvort sem þær beita


í horfið ? eða þær beygja af. 


En aldrei sá neinn þann, sem augað gaf,


? og uppsprettur ljóssins ei fundnar né skýrðar. 


Með beygðum knjám og með bænastaf


menn bíða við musteri allrar dýrðar. 


En autt er allt sviðið og harðlæst hvert hlið


og hljóður sá andi, sem býr þar.

Siglufjörður fyrr dag.

Mynd og texti: Sigurður Ægisson | sae@sae.is


SIGLFIRÐINGUR.IS | Sími: 899 0278 | Netfang: sae@sae.is