Hreinsunarátak í Fjallabyggð 21. maí næstkomandi


Bæjarstjórn Fjallabyggðar og Íslenska Gámafélagið ehf. hafa tekið höndum
saman um að snyrta og fegra umhverfi sveitarfélagsins. Ætlunin er að
Fjallabyggð verði ætíð til fyrirmyndar í snyrtimennsku og taki
sérstaklega vel á móti gestum sínum í sumar.

Af því tilefni verður staðið fyrir hreinsunarátaki í sveitarfélaginu með íbúum og fyrirtækjum.

Hreinsunarátak 21. maí

Hreinsunarátak með íbúum og fyrirtækjum í Fjallabyggð verður laugardaginn 21. maí og hefst formlega kl. 10.00. Á föstudegi verða settir út brotajárnsgámar, merktir Íslenska Gámafélaginu, við gámasvæðin. Fyrirtæki geta óskað eftir því við gámafélagið að fá gáma undir meiriháttar magn af úrgangi.

Gámar undir annarskonar úrgang verða staðsettir á opnum svæðum í þeim hverfum sem fjærst eru gámasvæðunum, á Siglufirði verða gámar norðan Eyrarflatar og á malarvellinum en í Ólafsfirði á túni norðan við Brimnes hótel. Gámasvæðin verða opin frá kl. 10.00-16.00, Íslenska Gámafélagið verður með opið hús í Seyruhúsinu þar sem íbúar geta skoðað jarðgerðarvél sem smíðuð var hjá SR á Siglufirði. Þar er framleidd molta sem er tilbúin til notkunar.

Kl. 16.00 á laugardegi verður boðið upp á grillaðar pylsur í boði Fjallabyggðar og Íslenska Gámafélagsins. Í Ólafsfirði verður grillað við Tjarnarborg en á Ráðhústorgi á Siglufirði.

Bæjarstjórn hvetur fyrirtæki og almenning til að taka til hendinni og gera bæina okkar hreina og fína, stefnum á að Fjallabyggð verði snyrtilegasta sveitarfélag á landinu.

Lagt er til að hverfi eða götur taki sig saman og vinni að hreinsun á sínu svæði og komi svo í grill á eftir.

Garðaúrgangur og múrbrot

Garðaúrgangur

Siglufjörður.    Við Öldubrjótinn hefur verið útbúið svæði til að losa garðaúrgang.

Ólafsfjörður.    Í gömlu grjótnámunni við Múlaveg er svæði til að losa garðaúrgang.

Vinsamlegast farið eftir leiðbeiningum á staðnum og losið aðeins garðaúrgang á svæðið, plast og annan úrgang skal losa á gámasvæðin. Lóðarhafar skulu koma sínum garðaúrgangi á losunarstað.

Múrbrot

Vinsamlegast hafið samband við bæjarverkstjóra eða umhverfisfulltrúa varðandi losun á múrbrotum og steypuafgöngum.

Fyrir hönd bæjarstjórnar,

bæjarstjóri Fjallabyggðar og umhverfisfulltrúi.

Á laugardaginn kemur, 21. maí, verður hreinsunarátak í Fjallabyggð.

Þessi mynd var tekin 1. maí 2011.

Og þessi sama dag.

Svona megum við ekki taka á móti gestum okkar.

Myndir: Sigurður Ægisson | sae@sae.is

Texti: Aðsend fréttatilkynning.


SIGLFIRÐINGUR.IS | Sími: 899 0278 | Netfang: sae@sae.is