Hnakkur fyrir hreyfihamlaða


„Ég er búin að ganga með þessa hugmynd í maganum í nokkur ár,“ segir Herdís Erlendsdóttir á Sauðanesi við utanverðan Siglufjörð að vestan, en á dögunum fékk hún loks í hendur sérsmíðaðan hnakk sem gerir hreyfihömluðum auðveldara með að stunda hestaíþróttina.

Herdís og eiginmaður hennar, Jón, eiga þrjú börn og eru með sauðfjárbú, hestaleigu og reiðnámskeið og hafa einnig verið fósturforeldrar í rúm 12 ár. Á Sauðanesvita er að auki vitagæsla og veðurathugunarstöð. Herdís kemur austan frá Dalatanga, þar sem foreldrar hennar voru vitaverðir lengi, en Jón er uppalinn á Sauðanesi. Í fjárskiptunum 1992–1994 tóku þau við búskap af foreldrum Jóns, Huldu Jónsdóttur og Trausta Magnússyni.

Hestaleigan, sem þau Herdís og Jón eiga og reka, Fjallahestar, býður upp á styttri og lengri útsýnis- og útivistarferðir, bæði fyrir vana og óvana reiðmenn, börn jafnt sem fullorðna. Hestarnir eru sérstaklega þjálfaðir til reiðar í fjalllendi og eru vel kunnugir Tröllaskaga.

Hugmyndin kviknaði

„Hugmyndin kviknaði út af því að ég var með hreyfihamlaðan einstakling hjá mér á reiðnámskeiði í hittifyrra og sá þá að ég þyrfti einhvern betri útbúnað en venjulegan hnakk, til að geta fest viðkomandi almennilega, til að vera ekki á nálum um að hann eða einhver annar í þessum sporum hallaðist eða þá dytti af,“ segir Herdís. „Þá fór ég aðeins að vinna í þessu, hugsa um hvernig ég gæti útfært þetta. Svo fór ég á dagsnámskeið í Mosfellsbæ síðasta haust, en þar er einmitt unnið með svona hnakk, og þá var lausnin komin. Ég átti þó eftir að finna hver gæti smíðað svona grip en kona úr Hestamannafélaginu Herði í Mosfellsbæ lóðsaði mig í því og leiddi okkur saman, mig og Brynjólf Guðmundsson bónda og söðlasmið, sem á og rekur Leðurverkstæðið í Hlöðutúni í Stafholtstungum í Borgarfirði.“

Þess má geta að fyrir þremur árum, nánar tiltekið á Handverkshátíðinni á Hrafnagili í Eyjafirði í ágúst 2015, fékk Brynjólfur viðurkenningu fyrir sams konar hnakk. Tók valnefndin sérstaklega eftir því, að ekki var slegið af fagurfræðilegum kröfum við gerð hans.

Hnakkur fyrir hreyfihamlaða hefur verið í notkun á Akureyri en ekki annars staðar á Tröllaskaga, eftir því sem Herdís veit best.

„Þetta er mjög vönduð smíð og falleg,“ segir hún. Svo er þarna reiði líka og fjórar gjarðir. Bakið er síðan hægt að taka af og þá nota hnakkinn á venjulegan hátt. Auk fatlaðra einstaklinga nýtist hann vel einhverfum börnum, sem oft geta verið annars hugar, því hægt er að festa þau niður í hnakkinn með sérstökum böndum sem honum fylgja. Á sumrin nýtist hann fyrir litla krakka sem eru kannski ekki alveg með jafnvægið í lagi, þeir geta þá haldið sér framan í hann. Og jafnvel bakveiku fólki líka.

Fékk rausnarlega styrki

Herdís fékk afar rausnarlegan styrk úr Samfélags- og menningarsjóði Siglufjarðar í fyrra, til að standa straum af kostnaði við þessi kaup, en hann er í vörslu Arion banka, og annan frá KEA.

„Það er hún Embla, tíu vetra hryssa sem fær þann heiður að vera með hnakkinn. Hún er alveg einstök þessi hryssa, róleg og yfirveguð. En ég er líka með fleiri örugga hesta, ef á þarf að halda,“ segir Herdís.

Hún er með tvö hesthús í Siglufirði og í þeim alls 16 hesta. „Ég get boðið upp á meira í vetur en ella, því síðustu ár hef ég alltaf þurft að ríða hingað inneftir einu sinni í viku, frá Sauðanesi, og hef tekið æfingar og allt með trompi, en það hefur verið erfitt og ég hefði ekki boðið í þetta núna eins og veðrið er búið að vera. En við vorum líka með æfingar heima. Svo er ég í Ólafsfirði líka á sumrin,“ segir hún.

Hún var að byrja námskeið vegna hinnar árlegu sýningar Æskan og hesturinn, hefur verið með slík námskeið í mörg ár, en á næsta hestanámskeiði verður hún með tvö mjög fötluð börn og fjögur einhverf og hún er spennt að sjá hvernig hnakkurinn eigi eftir að reynast. Hún kveðst reyndar treysta honum 100% og ekki síður henni Emblu.

Nærmynd af hnakknum.

Myndir og texti: Sigurður Ægisson | sae@sae.is.
Fylgja: Úr Morgunblaðinu í dag.

image_print

SIGLFIRÐINGUR.IS | Sími: 899 0278 | Netfang: sae@sae.is