Gull finnst í Héðinsfjarðargöngum


Eins og margoft hefur komið fram í íslenskum fjölmiðlum hafa menn átt í töluverðu basli með að hemja vatn í Héðinsfjarðargöngunum Ólafsfjarðarmegin og var þetta eitt af því sem hleypti upp kostnaði og gerði það að verkum að þau urðu dýrari en upphaflega var gert ráð fyrir.

Á dögunum fóru bandarískir sérfræðingar að meinsemdinni og beindu að henni háþróuðum, innrauðum myndabúnaði, og flettu í kjölfarið steypunni af og brutu sér leið innar en hingað til og þá kom í ljós hvað þarna var á seyði. Um var að ræða mikla gullæð sem lá eftir berginu en sú var og er töluvert gisin og hleypir vatni meðfram sér. Þetta hefur samt farið hljótt, eðli málsins samkvæmt, en er tekið að spyrjast út.

Hafa menn allt frá því þetta uppgötvaðist verið að skoða hina lögformlegu hlið málsins, og ekki er víst að Fjallabyggð muni njóta þessa, ríkið er nefnilega ekki enn búið að gera upp við Háfell eða aðra sem að þessu komu. Og Tékkland gæti e.t.v. líka bæst í slaginn.

Bæjarstjóri, Sigurður Valur Ásbjarnarson, hefur því ákveðið, í samráði við bæjarstjórn og lögfræðinga sveitarfélagsins, að halda blaðamannafund núna kl. 11.00, í sal Ráðhúss Fjallabyggðar á Siglufirði, og gera kröfu til þessa merka fundar. Biður hann bæjarbúa vinsamlegast um að fjölmenna til að sýna samstöðu, enda ljóst að sjónvarpsstöðvarnar muni allar senda fulltrúa sína og helstu dagblöð og vefmiðlar einnig.

Ekki þarf að fara um það mörgum orðum hve mikilvægt þetta er byggðarlaginu, enda sagði Mbl.is frá því 22. mars síðastliðinn að gull væri að nálgast metverð, og ekki á hverjum degi sem það finnst á Íslandi. Þetta kemur því á besta tíma. Jafnframt er ljóst að þetta muni ekki draga úr öfund þeirra, sem sjá ofsjónum yfir þessari dýrustu vegaframkvæmd Íslandssögunnar. En sé þetta eins mikið gull og mælitækin gáfu til kynna við fyrstu athugun er einsýnt að næstu göng verði úr Siglufirði og yfir í Fljótin – borguð úr vasa heimamanna.

Sundabraut hvað?

Að sögn bæjarstjóra verður þetta a.m.k. ekki gefið eftir, það sé alveg ljóst.
Fjallabyggðungar muni sækja rétt sinn með öllum ráðum.

Þetta er feiknamikil æð, eins og hér sést.

Og ekki ónýtur fengur þessi moli.

Hér sést í bergvegginn aðeins vestar.

Búið að setja steypu yfir allt saman en myndavélar gæta svæðisins náið,

og lögregla er ávallt í seilingarfjarlægð ef á þarf að halda.

Nú þegar fundurinn er orðinn opinber þarf enn strangari gæslu og spurning hvernig að því verður staðið.

Bæjarstjóri var að leggja síðustu hönd á ræðu sína

þegar fréttamaður og ljósmyndari Siglfirðings.is leit til hans snemma í morgun.

Myndir af gullinu: Bandaríska jarðgangastofnunin / April F. Oolsday. Birtar með sérstöku leyfi.

Mynd af bæjarstjóra og texti: Sigurður Ægisson | sae@sae.is


SIGLFIRÐINGUR.IS | Sími: 899 0278 | Netfang: sae@sae.is