Góðgerðarvika Neon


Nú stendur yfir Góðgerðavika hjá félagsmiðstöðinni Neon í Fjallabyggð. Þau ungmenni, sem eru að fara á SamFestinginn – sem er árleg hátíð Samfés, samtaka félagsmiðstöðva á Íslandi – um aðra helgi, ganga í hús í kvöld og föstudagskvöld og biðla til bæjarbúa um hógværan styrk til ferðarinnar. Þau verða ekki með posa. Neon greiðir fyrir rútuna suður og heim en sjálf greiða þau fyrir miðann á dansleikinn. Fyrir uppihaldi, bíóferð og ferð í skemmtigarð safna þeir. Alls eru 38 ungmenni skráð í ferðina sem er afar góð þátttaka. Neon sendir þrjá starfsmenn með en skylda er að senda einn starfsmann fyrir hverja 17 unglinga.

Góðgerðavikan sem nú stendur yfir gengur þannig fyrir sig að ungmennin gera góðverk. Flesta ef ekki alla dagana eftir að skóladegi lýkur eru þau í Samkaup Úrval verslununum að aðstoða og á veitingastaðnum Höllinni í Ólafsfirði. Einnig fara þau á leikskólana beggja vegna og hjálpa til og lesa fyrir börnin. Þá eru ungmenni að þvo glugga, taka þátt í félagsstarfi eldri borgara og sú skemmtilega uppákoma varð á mánudag þegar nokkrir drengir fóru í heimahús og sungu afmælissönginn fyrir tvö afmælisbörn.

Óhætt er að segja að líf og fjör fylgi unglingunum þessa vikuna eins og margar aðrar og eru uppátæki þeirra liður í skila góðum verkum til baka til samfélagsins í þakklætisskyni fyrir stuðninginn.

Þetta má lesa á heimasíðu sveitarfélagsins.

Sjá líka hér.

Mynd: Sigurður Ægisson | sae@sae.is.
Texti: Fjallabyggd.is / Sigurður Ægisson | sae@sae.is.

image_print

SIGLFIRÐINGUR.IS | Sími: 899 0278 | Netfang: sae@sae.is