FS gengur á Siglunes á morgun


Ferðafélag Siglufjarðar auglýsir gönguferð út á Siglunes á morgun, 30. júlí. Um 15-16 km vegalengd er að ræða þar sem mesta hæð er 450 metrar. Göngutími er áætlaður 6-8 klukkustundir. Fararstjóri verður Anna Marie Jónsdóttir. Bátsferð verður til baka.

Þátttakendur eru hvattir til að vera vel skóaðir og með gott nesti. Verð er kr. 2000. Skráning er hafin í síma 699 5022. Lagt verður af stað frá Ráeyri kl. 10.00.

Á heimasíðu FS er þessa leiðarlýsingu að finna:

Haldið er af stað frá flugvellinum á Ráeyri og gengið um rústir síldarverksmiðju Evangers sem eyðilagðist í snjóflóði úr Skollaskál 1919. Þaðan er gengið yfir Staðarhól litlu norðar og sjást þar tóftir samnefnds bæjar. Um Staðarhólsströndina er heppilegt að fylgja fjárgötum í hlíðarrótum. Upp af Selvíkurvita taka við Kambalágar og þar ofar opnast Kálfsdalur með litlu stöðuvatni. Áfram er haldið upp dalinn skáhallt til Kálfsskarðs í suðaustri. Í suðvestri blasir við bakhliðin á tveimur einkennisfjöllum Siglufjarðar, Hestskarðshnjúki og Staðarhólshnjúki, en utar og minni er Hinrikshnjúkur. Af skarðinu er greið leið niður í fremstu drög Nesdals. Nú tekur við langur gangur niður að sjó þar sem Reyðará liðast í ótal bugðum og fylgir Hestfjall okkur alla leið á hægri hönd. Í utanverðum Nesdal er þungvæð gróðurþemba. Austan við Reyðará stendur samnefnt býli og þaðan er gengið eftir ruddum akvegi vestur á Siglunes. Nesnúpur gnæfir yfir Siglunesvita og þar litlu norðar á sléttum melum stóðu herbúðir Breta og Bandaríkjamanna í seinni heimstyrjöldinni. Nú tekur sjálft Siglunes við og liggur vegurinn hjá rústum samnefnds höfuðbóls sem stóð þar frá landnámi Þormóðs ramma og fram yfir miðja 20. öld. Ferðalangar eru hvattir til að ljúka göngu sinni frammi á Nestá þar sem tóftir fornra verbúða eru enn sýnilegar. Þar vestur af eru miklar grynningar sem nefnast Hellan og til norðurs eru Svarthöfðasteinar og Slysfarir næst landi að sunnan. Bátsferð til baka.

Frá Siglunesi. Horft inn Siglufjörð.

Mynd og texti: Sigurður Ægisson | sae@sae.is.


SIGLFIRÐINGUR.IS | Sími: 899 0278 | Netfang: sae@sae.is