ÉG um MIG frá MÉR til ÞÍN


ÉG um MIG frá MÉR til ÞÍN er samsýning vinkvennanna, Kristínar Sigurjónsdóttur og Vilborgar Traustadóttur (Ippu frá Sauðarnesi). Sýningin verður opnuð í Bláa Húsinu við Rauðkutorg á Siglufirði á morgun, föstudaginn 5. ágúst, kl. 13.00 og stendur til sunnudagsins 7. ágúst kl. 17.00. Öll verk á sýningunni verða til sölu.

Þær vinkonurnar hafa fengist við listsköpun undanfarin ár. Kristín með myndavélina að vopni og Vilborg með pensilinn á lofti.

Þær stöllur hafa brallað margt saman í gegn um árin með misgóðum árangri enda hafa þær verið bestu vinkonur frá unglingsaldri. Þegar þeim datt það snjallræði í hug að sýna verkin sín saman, varð ekki aftur snúið. Vilborg hefur málað nokkur verk eftir ljósmyndum Kristínar, nokkrum ljósmyndum, pensilförum og hláturgusum síðar liggur afraksturinn fyrir. Vilborg sýnir einnig grafíkverk sín.

vilborg_traustadottir

Olía á striga: Vilborg Traustadóttir.

kristin_sigurjonsdottir

Ljósmynd: Kristín Sigurjónsdóttir.

Myndir og texti: Aðsent.



SIGLFIRÐINGUR.IS | Sími: 899 0278 | Netfang: sae@sae.is