Djöggl í Kompunni


Laugardaginn 3. febrúar næstkomandi kl. 15.00 opnar myndlistarmaðurinn Jón B. K. Ransu sýninguna Djöggl í Kompunni, Alþýðuhúsinu á Siglufirði. Þar mun hann draga málaralist og fjölleika saman í samtal á ný þar sem hringformið spilar aðalhlutverk í rýmislistaverki.

Listaverk Ransu byggja alla jafnan á endurskoðun listaverka eða liststefna sem skráð hafa verið í alþjóðlega listasögu. Sýningin Djöggl er engin undantekning á því en Ransu sækir þar í brunn mínimalisma sjöunda og áttunda áratug síðustu aldar og skoðar hið óhlutbundna nauma form í tengslum við athöfn eða gerning.

Jón B. K. Ransu er menntaður í Hollandi á árunum 1990-1995. Þar af var hann í skiptinámi við NCAD (National College of Art and Design) í Dublin í eina önn. Þá tók Ransu þátt í ISCP (International Studio and Curatorial Program) í New York árið 2006 og hlaut þá styrk úr sjóði The Krasner Pollock Foundation.

Uppbyggingarsjóður, Fjallabyggð og Egilssíld styrkja menningarstarf í Alþýðuhúsinu á Siglufirði.

Mynd og texti: Aðsent.


SIGLFIRÐINGUR.IS | Sími: 899 0278 | Netfang: sae@sae.is