Bók um framkvæmdastjóra SR


Margir eldri Siglfirðingar minnast Jóns Gunnarssonar sem var framkvæmdastjóri Síldarverksmiðja ríkisins á Siglufirði frá 1935 til 1936 og aftur frá 1938 til 1945. Jakob F. Ásgeirsson sagnfræðingur hefur skrifað bók um ævi þessa mikla athafnamanns en útgefandi er Ugla.

Í texta á bókarkápu segir: „Fáir menn hafa markað jafn djúp spor í atvinnusögu Íslendinga á tuttugustu öld og Jón Gunnarsson, húnvetnski sveitastrákurinn sem lauk verkfræðiprófi frá Massachusets Institue of Technology (MIT) árið 1930. Hann var framkvæmdastjóri Síldarverksmiðja ríkisins á þeim árum þegar síldarvinnsla var mikilvægasti útflutningsatvinnuvegur landsmanna. Síðar byggði hann upp nánast af eigin rammleik stærsta fyrirtæki Íslendinga í útlöndum, Coldwater Seafood Corporation, dótturfyrirtæki Sölumiðstöðvar hraðfrystihúsanna í Bandaríkjunum. Með viðamiklu sölustarfi skapaði hann íslenskum sjávarafurðum nafn á stærsta markaði heims. Það lagði grunn að uppbyggingu hraðfrystiiðnaðar sem áratugum saman var burðarás íslensks atvinnulífs og grundvöllur hagvaxtar í landinu.“

Nokkrir kaflar í bókinni fjalla um Siglufjarðarár Jóns og Sigurlínu Björnsdóttur, konu hans, og barna þeirra, Guðríðar og Gunnars Björns. Þessir kaflar eru mjög fróðlegir og bókin í heild áhugaverð.

Mynd: Aðsend.
Texti: Jónas Ragnarsson │ jr@jr.is.

image_print

SIGLFIRÐINGUR.IS | Sími: 899 0278 | Netfang: sae@sae.is