Bæjarlífspistill


Morgunblaðið birtir reglulega pistla fréttaritara sinna, í þætti sem
nefnist Úr bæjarlífinu. Er þar reynt að bregða upp myndum úr heimabyggð
og því sem fólk úti um land hefur verið og er að fást við hverju sinni.
Þetta á að vera stutt og hnitmiðað. Þann 4. janúar og 10. september
2011, 28. janúar, 21. júlí og 10. nóvember 2012 og 6. apríl, 17. ágúst og 14. desember
2013 var komið að Siglufirði. Og svo í dag.

Þar segir:


Umsvif sjaldan meiri en nú

  • Miklar framkvæmdir standa nú yfir á Siglufirði og fara þarf aftur á fimmta áratug síðustu aldar til að finna sambærileg umsvif.
  • Þjónustuver ríkisskattstjóra er nú alkomið norður, til Siglufjarðar og Akureyrar. Þetta gerðist um áramótin. Starfsmenn eru 28.
  • Bæjarlistamaður
    Fjallabyggðar 2014 er Leikfélag Fjallabyggðar. ?Stöngin inn? var sem
    kunnugt er valin áhugaverðasta sýning hjá áhugamannaleikfélagi á landinu
    2013 og var LF í kjölfarið boðið að setja hana upp í Þjóðleikhúsinu.
  • Af
    rúmlega 33.000 fyrirtækjum sem skráð eru í hlutafélagaskrá verðskulda
    462 nafnbótina ?Framúrskarandi fyrirtæki 2013? samkvæmt mati Creditinfo.
    Þar í hópi eru Primex ehf. og SR-Vélaverkstæði hf. sem einnig var þarna
    2012 og 2011.
  • Þrír Siglfirðingar voru í hópi þeirra sem fengu
    Edduverðlaun í ár; Gunnar Pálsson fyrir leikmynd ársins (Fólkið í
    blokkinni), Karl Rúnar Karlsson Lillendahl fyrir framlag sitt til
    Djöflaeyjunnar og Sigríður Margrét Vigfúsdóttir hlaut heiðursverðlaun
    Eddunnar fyrir yfir tuttugu ára þrotlaust starf í þágu íslenskra
    kvikmynda á erlendri grundu.
  • Síldarminjasafn Íslands opnaði í
    mars nýja heimasíðu. Þar kemur m.a. fram, að árið 2013 hafi verið mesta
    aðsókn þangað frá upphafi, en þá litu inn um 20.000 gestir. Og
    útlendingar hafa aldrei verið fleiri. Safnið fagnar 20 ára afmæli á
    þessu ári.
  • Siglfirskir jaðrakanar hafa eins og aðrir farfuglar
    leitað á varpstöðvar sínar hér. Þar í hópi eru margir sem bera litmerki,
    sem þeir hafa fengið á síðustu árum, ýmist sem ungar eða fullvaxnir.
    Hefur komið í ljós að vetrarheimkynnin eru mikið til á Írlandi og
    Englandi, en þó eru einhverjir jafnframt í Skotlandi, Wales, Hollandi,
    Frakklandi, Portúgal og á Spáni.
  • Hallfríður Nanna Franklínsdóttir
    er elsti núlifandi Siglfirðingurinn. Hún fagnaði 98 ára afmæli sínu á
    mánudaginn var, er fædd 12. maí 1916 að Litla-Fjarðarhorni í Kollafirði í
    Strandasýslu. Foreldrar hennar voru Franklín Þórðarson og Andrea
    Jónsdóttir, sem bjó síðustu árin á Siglufirði og lést þar 1979, 97 ára.
    Systkinin voru 13 og er meðalaldur þeirra 91 ár sem er met þegar svo
    mörg systkini eiga í hlut. Fjögur af systkinunun eru enn á lífi. Auk
    Nönnu eru það Guðborg Franklínsdóttir á Siglufirði, en hún varð 90 ára í
    síðustu viku, Margrét Franklínsdóttir á Siglufirði, 92 ára, og Anna
    Margrét Franklínsdóttir á Selfossi, sem verður 104 ára í næsta mánuði.
    Af þeim systkinum sem eru látin náði eitt 98 ára aldri, eitt varð 94
    ára, eitt 93 ára, eitt 92 ára og eitt 90 ára. Þannig hafa níu af þrettán
    systkinum frá Litla-Fjarðarhorni náð níutíu ára aldri.
  • Þjóðlagahátíðin
    sumarið 2014 verður haldin dagana 2.-6. júlí og núna í 15. sinn. Verður
    hún með líku sniði og undanfarin ár en ber að þessu sinni yfirskriftina
    Dragspilið dunar. Harmonikkan verður sumsé í öndvegi og koma
    harmonikkuleikarar víða að. Sérstök áhersla verður lögð á franska
    tónlist.

Siglufjörður 15. maí 2014.

Stærri mynd hér.

Mynd og texti: Sigurður Ægisson | sae@sae.is.


SIGLFIRÐINGUR.IS | Sími: 899 0278 | Netfang: sae@sae.is