Arion banki opnar á Siglufirði


Þann 23. nóvember síðastliðinn opnaði Arion banki nýtt útibú við Túngötu 3 á Siglufirði. Það er byggt á grunni starfsemi Sparisjóðs Siglufjarðar. Einnig hefur útibú Sparisjóðs Skagafjarðar á Sauðárkróki sameinast starfsemi útibús Arion banka á staðnum. Sú fjarvinnsla sem AFL sparisjóður sinnti fyrir Arion banka á Siglufirði er nú hluti af viðskiptaumsjón og lífeyrisþjónustu bankans. Þar með er samruna AFL sparisjóðs og Arion banka lokið.

Alls starfa um 30 manns hjá Arion banka í Fjallabyggð.

Oddgeir Reynisson hefur verið ráðinn útibússtjóri Arion banka í Fjallabyggð, en Arion banki starfrækir útibú bæði á Siglufirði og Ólafsfirði. Oddgeir er viðskiptafræðingur að mennt. Síðastliðin átta ár starfaði hann sem rekstrarstjóri hjá fjarskiptafyrirtækinu NOVA og árunum 2001-2007 sinnti hann ýmsum stjórnunarstörfum hjá Emblu, Medcare og Flögu. Á árunum 1995-2001 var Oddgeir fjármálastjóri hjá Nesskipum. Oddgeir er kvæntur Herdísi Guðmundsdóttur og saman eiga þau þrjú börn. Fjölskyldan mun setjast að á Siglufirði, þaðan sem Herdís er ættuð.

Helgi Jóhannsson, sem verið hefur útibússtjóri Arion banka í Ólafsfirði frá árinu 2012, þegar bankinn sameinaðist Sparisjóði Ólafsfjarðar, mun gegna starfi þjónustustjóra Arion banka á Ólafsfirði. Þjónustustjóri bankans á Siglufirði er Guðrún Sif Guðbrandsdóttir, sem áður starfaði hjá Sparisjóði Siglufjarðar.

Svæðisstjóri Arion banka á Norður- og Austurlandi er Jónas Björnsson.

Starfsemi Arion banka á Norður- og Austurlandi er umtalsverð og er bankinn með stærri atvinnurekendum á svæðinu. Arion banki starfrækir nú fimm útibú á Norðurlandi: á Blönduósi, Sauðárkróki, Akureyri og tvö í Fjallabyggði, þ.e. á Siglufirði og Ólafsfirði. Að auki rekur bankinn útibú á Egilsstöðum. Arion banki starfrækir einnig fjarvinnslu á Siglufirði og Akureyri, m.a. í tengslum við lífeyrisþjónustu bankans. Alls vinna rúmlega 80 starfsmenn hjá Arion banka á Norður- og Austurlandi.

Siglfirðingur.is óskar hinum nýja útibústjóra og fjölskyldu hans innilega til hamingju og fagnar komu þeirra norður.

Herdís og Oddgeir og börn þeirra.

Myndir: Aðsendar.
Texti: Aðsendur / Sigurður Ægisson | sae@sae.is.

image_print


SIGLFIRÐINGUR.IS | Sími: 899 0278 | Netfang: sae@sae.is