Allt á hreyfingu


Mikið hefur fennt á norðanverðu landinu undanfarna sólarhringa og hefur Siglufjarðarvegur t.a.m. verið lokaður vegna snjóflóða.

„Ég held að það hafi skapast nákvæmlega sama ástand núna og í ágúst í fyrra í rigningunni, þegar Hvanneyraráin fór úr böndum. Það er búin að vera gríðarleg ofankoma á tiltölulega litlu svæði yst á Tröllaskaga, með þessum afleiðingum sem raun ber vitni núna. Það voru meira að segja að falla snjóflóð úr Heljartröðinni, þegar veðrið var nýskollið á, ég hef aldrei heyrt þess getið áður að eitthvað hafi komið þar niður,“ sagði Gestur Hansson, snjóathugunarmaður Veðurstofu Íslands á Siglufirði til fjölda ára, þegar tíðindamaður Siglfirðings.is hafði samband við hann fyrir stundu. „Það var bara öll hlíðin hérna fyrir ofan bæinn og út alla Hvanneyrarströndina á hreyfingu. Ég held ég hafi hætt að telja þegar ég var kominn í 28 spýjur sem ná inn á veg, fyrir utan bæði spýjur og stærri flóð, sem sum hver náðu alla leið ofan í sjó, sérstaklega á Miðströndinni og næsta gili sunnan við. Þetta er með því meira sem ég hef séð.“

Byrjað var að hreinsa veginn norðan og vestan Siglufjarðar upp úr hádegi í dag og til þess notaður fjöldi moksturstækja. Nú er þar þungfært og skafrenningur.

„Hvað byggðina varðar, þá er þetta orðið svo vel varið hérna í kringum okkur, að við erum tiltölulega örugg. Og meðan menn beita þessum lokunum á vegum þá getur maður verið þokkalega vel sáttur við þetta. Þessi gæsla sem er orðin, að loka bara veginum og fylgjast með veðurspá og ástandi snjóalaga, hún er að virka, því við höfum fengið flóðin undanfarið á lokaða vegi,“ sagði Gestur.

Gróuskarðshnjúkur.

Hafnarhyrna.

Það eru snjóflóð úr öllum giljum á Hvanneyrarströndinni, mis stór. Sum eru niður í sjó. Þau eru 1-6 metrar á þykkt.

Mokstur í gangi.

Myndir: Gestur Hansson.
Texti: Sigurður Ægisson | sae@sae.is.


SIGLFIRÐINGUR.IS | Sími: 899 0278 | Netfang: sae@sae.is