Afskekkt


Á morgun, 4. júlí, kl. 18.00–21.00, verður sýningin Afskekkt opnuð í sýningarrými Seguls 67 á Siglufirði og verður opin þar daglega á Strandmenningarhátíðinni, frá kl. 14.00 til 18.00, til 8. júlí. Listamennirnir sem taka þátt eru allir búsettir, alfarið eða að hluta, í Fjallabyggð og er áhugavert að stefna þeim saman til sýningar á Strandmenningarhátíð.

Listamennirnir eru í stafrófsröð þessir: Aðalheiður S. Eysteinsdóttir, Arnar Ómarsson, Arnar Steinn Friðbjarnarson, Bára Kristín Skúladóttir, Bergþór Morthens, Brák Jónsdóttir, Brynja Baldursdóttir, Eva Sigurðardóttir, Garún, Helena Hansdóttir Aspelund, Helena Stefánsdóttir, Hólmfríður Vídalín Arngrímsdóttir, Hrafnhildur Ýr Denke, J Pasila, Ólöf Helga Helgadóttir og Örlygur Kristfinnsson.

Afskekkt

Að morgni hátíðardags fara vegaverkamenn á fánum skreyttu fjórhjóli um bæinn og mála sebradýr þvert á akbrautir. Íbúar Fjallabyggðar safnast saman til ræðuhalda, kaffidrykkju og skemmtana. Fólk er uppáklætt og lætur napran norðanvindinn ekki hafa áhrif á hátíðarskapið. Enn snjóar í fjöll, enda erum við stödd í einni af nyrstu byggðum Íslands. Í dag er heldur rólegra yfir Siglufirði en Ólafsfirði þar sem hátíðardagskráin fer fram að mestu. Kötturinn Lóa hirðir ekki um sebrarendurnar og lallar letilega skáhallt yfir Túngötuna. Fjölskyldur aka saman um bæinn og kíkja inn á sýningar og söfn. Hér veit fólk að einstaklingsframtakið er lífsnauðsynlegt sem og samvinna og samhugur í öllum málum. Það hefur sýnt sig að það munar um hverja manneskju og hverja þá skapandi hugsun sem kemur góðu til leiðar. Frumkrafturinn á þessum afskekkta stað stafar frá ólgandi Atlantshafinu, frá stórbrotnum fjallahringnum sem umvefur allt, með norðanstormi og sunnanvindum. Mannlífið er í takti við náttúruna og vitundina um að hér er fegurðin fegurst og drunginn dekkstur.

Aðalheiður S. Eysteinsdóttir, sýningarstjóri.

Mynd og texti: Aðsent.

image_print

SIGLFIRÐINGUR.IS | Sími: 899 0278 | Netfang: sae@sae.is