Afinn fæddist á átjándu öld


Zophanía G. Briem, sem fæddist á Siglufirði fyrir 90 árum, er eini núlifandi Íslendingurinn sem á afa sem fæddist á átjándu öld, Siglfirðinginn Halldór Jónsson. Frá þessu er sagt á Facebook-síðunni Langlífi.

Halldór var bóndi í Fljótum í Skagafirði en var fæddur á Siglufirði 14. nóvember 1790 (sjö árum eftir Skaftárelda) og dó 1855, 64 ára. Halldór átti fimm börn með þremur konum.

Yngsti sonur Halldórs fæddist þegar hann var 62 ára. Það var Einar Halldórsson bóndi og sjómaður í Fljótum í Skagafirði og síðar síldarmatsmaður á Siglufirði, fæddur 1853, dáinn 1941, 88 ára. Einar átti fjórtán börn með tveimur konum. Elst var Rósa, amma Ólafs G. Einarssonar fyrrverandi ráðherra og Þorgeirs Þorgeirsonar rithöfundar.

Yngsta barn Einars er Zophanía G. Briem, fædd í janúar 1925. Þá var faðir hennar 71 árs. Zophanía, sem kölluð er Góa, er orðin 90 ára. Hún býr í Reykjavík.

Þetta langa æviskeið þriggja kynslóða, 225 ár, er met meðal núlifandi Íslendinga. Íslandsmetið, 226 ár, á María Tryggvadóttir sem lést vorið 2007.

Af öðrum núlífandi Íslendingum má nefna að afi Sigurveigar Jóhannsdóttur í Reykjavík fæddist fyrir 213 árum, afi Friðriks Kristjánssonar á Akureyri fæddist fyrir 207 árum og afi Sigurlaugar Björnsdóttur í Rangárvallasýslu fyrir 206 árum.

Meðal systkina Zophaníu voru Benedikt Einarsson vélstjóri í Hafnarfirði, Guðmundur Einarsson vélstjóri á Siglufirði, Maron Einarsson sjómaður á Siglufirði og Jón Einarsson vélstjóri á Siglufirði og Akranesi.

Texti: Jónas Ragnarsson.
Mynd: Af Facebook-síðunni Langlífi.



SIGLFIRÐINGUR.IS | Sími: 899 0278 | Netfang: sae@sae.is