Aðalheiður S. Eysteinsdóttir með sýningu á Húsavík


Á morgun, 2. september, verður opnuð í Safnahúsinu á Húsavík sýningin ?Að kvöldi réttardags?. Er það 32. sýning í 50 sýninga röð á verkum Aðalheiðar S. Eysteinsdóttur.

 

Á vef safnsins segir m.a. eftirfarandi:

 

?Aðalheiður S. Eysteinsdóttir fæddist á Siglufirði 23. júní 1963 og bjó þar til
 1986, þá fluttist hún til Akureyrar. Hún stundaði nám við Myndlistarskólann á 
Akureyri 1989-1993 og hefur síðan unnið ýmis störf á sviði myndlistar ásamt því
 að vera athafnasamur myndlistarmaður. Árið 2000 hóf Aðalheiður þátttöku í
 Dieter Roth akademíunni og mun halda þeirri samvinnu áfram…

Verk Aðalheiðar eru skúlptúrar og lágmyndir unnar úr timbri og fundnum
 hlutum. Listakonan raðar saman timburbútum svo úr verða lifandi manneskjur,
 dýr og hlutir sem tengjast aðstæðum hverju sinni. Þrátt fyrir að efniviðurinn sé
 oft óheflað afgangstimbur og yfirbragð verkanna grófgert hvílir yfir þeim
 fínleiki, næmni og hlýja. Henni tekst að gæða efnivið, sem sumir myndu kalla 
rusl, lífi og heilla áhorfendur með hrífandi verkum. Aðalheiður vinnur gjarnan
 að list sinni í samstarfi við aðra listamenn, og að þessu sinni Arnar Ómarsson.
 Arnar Ómarsson lauk Bachelor-gráðu við Listaháskólann í Lundúnum nú í vor og 
hefur verið búsettur þar síðastliðin þrjú ár. Hann hefur tekið þátt í fjölda sýninga 
þar ytra og einnig í Danmörku og Þýskalandi. Arnar hefur unnið mikið með Sean 
Millington undir heitinu Ar-Se, og halda þeir úti vefsíðunni www.ar-se.co.uk.

Aðalheiður dregur í verkum sínum upp mynd af samfélagi í tilraun til að 
minna okkur á hvaðan við komum og hver við erum. Sjálf segist hún leitast við
 að endurgera eftirminnileg augnablik úr eigin lífi en ýmsar
 mannlífsmyndir hafa alla tíð verið viðfangsefni hennar. Verkin eru
 einskonar brú milli veruleika og ímyndunar í samfélagi sem er of upptekið til að
 staldra við og njóta.


?Að kvöldi réttardags? er 32. sýningin í 50 sýninga röð á verkum Aðalheiðar.
 Sýningarnar verða settar upp víða um heim á tímabilinu júní 2008 til júní
 2013 undir yfirskriftinni ?Réttardagur – 50 sýninga röð?. Tímabilið er á
 milli fjörutíu og fimm ára og fimmtugs afmælis listakonunnar en tilefnið 
er sá siður Aðalheiðar að standa fyrir sýningum á skemmtilegum tímamótum.
 Útgangspunktur sýninganna er dagurinn þegar fé er safnað af fjalli, upphaf nýs
tímabils, menning og allsnægtir.


Í Safnahúsinu á Húsavík fjallar listakonan um kyrrðina sem leggst yfir þegar féð 
bíður örlaga sinna, og bændur varpa mæðunni eftir göngur og smölun.?

Sjá hér.

Eitt verkanna á sýningunni.

Mynd: Fengin af vef Safnahússins á Húsavík.

Texti: Safnahúsið á Húsavík / Sigurður Ægisson | sae@sae.is.


SIGLFIRÐINGUR.IS | Sími: 899 0278 | Netfang: sae@sae.is